Qızın varsa, pensiyaya bir neçə il tez çıxa bilərsən

Qızın varsa, pensiyaya bir neçə il tez çıxa bilərsən
Vüqar Bayramov: “Ailələrə qız uşaqlarının sayının artırılması üçün maliyyə yardı­mı ödənilməlidir”

“Uşaqların sayı ikidən çox və qızların sayı isə birdən artıq olan ailələrdə vali­deynlər üçün pensiya yaşının azaldılması məqsədəuyğun olar”

Azərbaycanda demoqrafiya sahə­sində vəziyyət heç də ürəkaçan deyil. Dünyaya gələn oğlan uşaq­larının sayı qızlara nisbətən yenə də çoxluq təşkil edir.

Qeyd edək ki, 1990-cı illərin əvvəllə­rindən oğlan uşaqlarının artımı müşa­hidə olunur və hazırda hər 100 doğu­lan qıza 116 oğlan düşür.

Məlumat üçün bildirək ki, 2012-2013-cü tədris ilində ümumtəhsil məktəblə­rində I sinif şagirdlərinin faktiki sayı 135 541 nəfər olub. Onlardan 73 182 nəfəri oğlan, 62 359 nəfəri isə qız olub. 2013-2014-cü tədris ilində I sinfə gedən şagirdlərin sayı 141 166 nəfər olub. Onlardan 74 998 nəfəri oğlan, 66 168 nəfəri qızdır. Bu rəqəmlər də demoqrafik disbalansın mövcudluğunun real təsdiqidir.

Ekspertlər ailələrdə qız uşaqlarının sayının artması üçün maraqlı təkliflər irəli sürür.

İqtisadçı-ekspert Vüqar Bayramov “Azərbaycan Respublikasında əhali sakinliyi və demoq­rafik inkişaf sahəsində Dövlət Proqramı (2014-2025-ci illər)” layihəsi ilə bağlı bir çox məsə­lələrin müəyyənləşdirilməsi ilə əlaqədar yeni təkliflər irəli sürür: “Əmək və Əhalinin Sosial Müdafiəsi Nazirliyinə verilən təkliflərdən biri ailələrə qız uşaqlarının sayının artırılması üçün maliyyə yardımlarının ödənilməsi ilə bağlıdır. Bununla bağlı dövlət tərəfindən də dolayı dəs­təyin verilməsi doğru olar. Uşaqların sayı ikidən çox və qızların sayı isə birdən artıq olan ai­lələrdə valideynlər üçün pensiya yaşının azaldılması məqsədəuyğun olar. Təklif nəzərə alı­narsa, bu, valideynləri uşaqların və qızların sayının artırılmasına təşviq edəcək. Gəlir vergi­sinin aşağı salınması ilə bağlı işlərin görülməsinə də ehtiyac var. Çünki bu məsələ də ailə­lərdə uşaqların sayının stimullaşdırılmasına dolayı yolla kömək edəcək”.

Leave A Comment