Aqrar sektora dövlət yardımı kəskin azaldılıb

 Gələn ilin büdcəsində bu sektora ayırlan vəsait 25 milyon manat azalıb

Vüqar Bayramov: «Nəzarət gücləndirilməsə, o zaman ayrılan vəsaitin böyük və kiçik olmasının heç bir əhəmiyyəti yoxdur»

06 -11 -2009

Gələn ilin büdcəsində aqrar sektora 382 milyon manat vəsaitin ayrılması nəzərdə tutulur. Bunu büdcə ilə bağlı komitənin iclasında Milli Məclisin Aqrar siyasət komitəsinin sədri Eldar İbrahimov bildirib. Deputat onu da qeyd edib ki, ümumi büdcədə azalma getsə də, kənd təsərrüfatı sahəsində azalma yoxdur: «Burada az da olsa, dinamika var».

Qeyd edək ki, 2009-cu ilin büdcəsində ümumilikdə, kənd təsərrüfatı sahəsinə 409 milyon manata yaxın vəsait ayrılmışdı. Cari illə müqayisədə burada 25 milyon manat azalma müşahidə olunur. Hökumətin aqrar sektoru dövlətin əsas prioritet sahəsi kimi irəli sürməsinə baxmayaraq, onsuz da cüzi olan vəsaitlərin daha da azaltması təəccüb doğurur.

Faktı şərh edən İqtisadi və Sosial İnkişaf Mərkəzinin rəhbəri Vüqar Bayramov bildirdi ki, əsas məsələ vəsaitin azlığı və ya çoxluğu deyil. Çünki hər bir halda mənimsə faktları mövcuddur. Ona görə ilk öncə bu sahədə nəzarəti gücləndirərək, şəffaflığı təmin etmək lazımdır: «2010-cu ildə aqrar sektora ayrılan vəsaitin artacağı gözlənilirdi. Amma büdcə azalmaları burada da hiss olunmaqdadır.

Bir məsələni qeyd etmək lazımdır ki, aqrar sektorun inkişafı üçün kompeleks tədbirlər görülüməlidir. Fermerlərə yardım tək subsidiya şəkilində deyil, digər metodlardan da istifadə edilməlidir. Çünki Azərbaycan Dünya Ticarət Təşkilatına üzv olmağa çalışır. Bu təşkilata üzv olduqdan sonra aqrar sektora il ərzində istehsal olunmuş məhsulun ən yaxşı halda 10 faizi həddində subsidiya həyata keçirə bilərsən. Sözügedən sektora böyük həcmdə vəsaitlərin subsidiya şəkilində yönəldilməsi fermerlərdə müəyyən qədər tənbəlliyin yaranmasına gətirib çıxara bilər. Dünya Ticarət Təşkilatına üzv olandan sonra mütləq üstünlüyünü itirə bilər. Çünki subsidiya minimallaşsa, bizim fermerlər rəqabətə davam gətirə bilməyəcəklər».

V.Bayramov bildirdi ki, bu sahədə infrastruktur yaxşılaşdırılmalıdır: «Gübrələr bazar qiymətindən ucuz verilməlidir. Subsidiyaların özünün verilməsində böyük problemlər var. İcra hakimiyyətləri yardımların verilməsinə müdaxilə edir. Bir neçə rayonda monitorinqimiz olmuşdu. Orada yerli icra hakimiyyətləri tərəfindən fermerlərdən kartların yığılmasının və gecə ilə subsidiyaların banklardan çəkilməsinin şahidi olmuşduq. Bu sahəyə nəzarət gücləndirilməlidir. Əgər nəzarət gücləndirilməsə, o zaman aqrar sektora ayrılan vəsaitin böyük və kiçik olmasının heç bir əhəmiyyəti qalmayacaq. Əsas odur ki, həmin maliyyə istiqaməti üzrə şəffaf xərcləsin».

«Fermerlərin istehsal etdiyi məhsulların yerləşdiriməsi üçün anbarlar yoxdur, onları bazarlara çıxarıb sata bilmirlər. Nəticədə məhsulları xarab olur. Hətta bazarlara çıxaranda belə böyük maneələrlə rastlaşırlar. Bu xoşagəlməz hallar aradan qaldırılmalıdır. Vaxtilə Azərbaycan kənd təsərrüfatı məhsulları MDB məkanında böyük paya malik olub. İndi bu bazarı saxlamaq üçün dövlətin dəstəyi lazımdır» deyən ekspert bildirdi ki, Dünya Ticarət Təşkilatına üzv olmamışdan öncə baza yaradılmalıdır: «Burada nəzarəti gücləndirərək fermerlərin fəaliyyətinə qarşı müdaxilələrin qarşısının alınması, kənd təsərrüfatı emal sənayesinin inkişaf etdirilməsi vacib amillərdəndir».

Vüsalə RÜSTƏMOVA

“Bizim yol”