Torpaq sahəsinin satış müddəti 247 günə çatıb

             Yasamalda torpaq ucuzlaşıb  

“Əmlak Bazarı İştirakçıları” İctimai Birliyi torpaq bazarında apardığı monitorinqin nəticələrini açıqlayıb. Birliyin rəhbəri Ramil Osmanovun qəzetimizə açıqlamasına görə, torpaq bazarının şəhərətrafı və paytaxtdan kənar ərazilərə doğru genişlənməsi tendensiyası dekabr ayında bir qədər zəifləyib: “Ay ərzində torpaq üzərində bağlanan alqı-satqı əqdlərinin sayında müvafiq olaraq azalma müşahidə olunub.  Bazarın aktivliyi əvvəlki aya nisbətən mənfiyə doğru dəyişib.

Aparılan bazar araşdırmaları göstərir ki, şəhərin mərkəzində torpaq sahələrinin həddən artıq məhdudlaşması I zonada tələb və təklifin strukturunun dəyişməsi ilə yanaşı, qiymətlərin stabil qalmasına səbəb olub. Söküntü işlərinin azalmasına baxmayaraq I zonada torpağın bazar qiyməti hələ də real dəyərindən baha olaraq qalmaqdadır”.

Ekspert deyir ki, bazarda torpağın ekspozisiya müddəti əvvəlki ayla müqayisədə 0,8% artaraq 247 günə çatıb. Yaranmış vəziyyət əsasən bazarda tələb və təklifin strukturunun tərs mütənasib dəyişməsi və iqtisadi böhranın ölkənin torpaq bazarına mənfi təsiri nəticəsində meydana çıxıb. Bu tendensiya mövsümlə əlaqədar bir qədər də dərinləşib.

 

Məlum olur ki,  yanvar  ayı ərzində qiymət azalması bütün zonalarda qeydə alınıb: “Şəhərin mərkəzində qiymətlərin həddən artıq yüksək olması I və II zonalarda tələbin aşağı düşməsi ilə paralel qiymətlərin də azalmasına səbəb olub. Yanvarda rayonlar üzrə ən çox qiymət azalması Yasamal (-2,4%) rayonunda qeydə alınıb. Bütün bunlarla yanaşı, hazırda torpaq bazarında nisbətən aktiv rayonlar sırasına Binəqədi və Nizami rayonları başçılıq edirlər. Ən passiv rayon isə ötən aylar olduğu kimi Nəsimi rayonudur. Yanvar ayında torpaq bazarında ən bahalı torpaq sahəsi 190000 $sot Nəsimi (Avropa oteli) rayonunda, ən ucuz torpaq sahəsi isə 350 $sot Abşeron (Pirəkəşkül qəsəbəsi) rayonunda qeydə alınıb”.

LEYLA